டிராகன் சினிமா விமர்சனம் : டிராகன் இளமை துள்ளலுடன் கலக்கும் ஒரு நேர்த்தியான பொழுதுபோக்கு சித்திரம் | ரேட்டிங்: 4/5

நடிகர்கள் :
பிரதீப் ரங்கநாதன் – டி ராகவன்
அனுபமா பரமேஸ்வரன் – கீர்த்தி
கயாடு லோஹர் – பல்லவி​
வி.ஜே.சித்து – அன்பு
ஹர்ஷத் கான் – கேடி (ஏ) வெற்றி
கே.எஸ்.ரவிக்குமார் – பரசுராம்
மிஷ்கின் – மயில்வாஹனன்
கௌதம் வாசுதேவ் மேனன் – வேல் குமார்
மரியம் ஜார்ஜ் – தனபால்
இந்துமதி – சித்ரா
தேனப்பன் – தேனப்பன்
தொழில்நுட்ப கலைஞர்கள் :
அஸ்வத் மாரிமுத்து எழுதி இயக்குகிறார்
பேனர்: ஏஜிஎஸ் என்டர்டெயின்மென்ட் (பி) லிமிடெட்
தயாரிப்பாளர்கள்: கல்பாத்தி எஸ் அகோரம், கல்பாத்தி எஸ் கணேஷ், கல்பாத்தி எஸ் சுரேஷ்
கிரியேட்டிவ் தயாரிப்பாளர்: அர்ச்சனா கல்பாத்தி
அசோசியேட் கிரியேட்டிவ் தயாரிப்பாளர்: ஐஸ்வர்யா கல்பாத்தி
நிர்வாகத் தயாரிப்பாளர்: எஸ்.எம்.வெங்கட் மாணிக்கம்
இசையமைப்பாளர்: லியோன் ஜேம்ஸ்
ஒளிப்பதிவு இயக்குனர்: நிகேத் பொம்மி
எடிட்டர்: பிரதீப் இ ராகவ்
பாடலாசிரியர்: விக்னேஷ் சிவன், கோ சேஷா, கானா அபேலோ
அதிரடி : விக்கி மற்றும் திலீப் சுப்பராயன்
நடனம்: பிருந்தா, சாண்டி, அசார், ஜே.டி
கதை: அஸ்வத் மாரிமுத்து, பிரதீப் ரங்கநாதன்
திரைக்கதை, வசனம்: அஸ்வத் மாரிமுத்து
ஆடை வடிவமைப்பாளர்கள்: தினேஷ் மனோகரன், பிரவீன் ராஜா
பத்திரிக்கை தொடர்பு : நிகில் முருகன்

படம் தொடங்கும் போது, பள்ளியில் படிப்பில் முதலிடம் பிடித்த டி ராகவன் (பிரதீப் ரங்கநாதன்) அறிமுகம் கிடைக்கிறது. அவன் கணினி அறிவியலில் தங்கப் பதக்கம் வென்றவன். ஆனால் அவன் பள்ளியில் உடன் படிக்கும் ஒரு மாணவியிடம் தன் காதலை முன்மொழியும் போது, அவள் தனக்கு படித்து ஒழுக்கமாக இருக்கும் ஒருவனை விட, கெத்தாக சுற்றி வரும் ஒரு போக்கிரித்தனமான மாணவன் தான் தனக்கு பிடிக்கும் என்று கூறுகிறாள். பள்ளி படிப்பை முடித்த டி ராகவன் (பிரதீப் ரங்கநாதன்) கல்லூரி வாழ்க்கையில் டிராகன் என்ற பெயரில் போக்கிரியாக அட்டகாசம் செய்து கெத்தாக வலம் வருகிறான். கல்லூரி முதல்வர் மயில்வாஹனனுடன் (மிஷ்கின்) ஏற்படும் பிரச்சனையால் 48 அரியர்களுடன் இறுதி ஆண்டு முடியும் தருவாயில் கல்லூரியை விட்டு பாதியிலேயே வெளியேறுகிறார். மேலும் டிராகனின் இந்த ஊதாரித் தனத்தால் அவரது காதலி கீர்த்தி (அனுபாமா பரமேஸ்வரன்) பிரேக்கப் செய்து விடுகிறார். 2 ஆண்டுகளாக வேலை வெட்டி எதுவும் செய்யாமல் நண்பர்களிடம் பணம் வாங்கி பெற்றோரை ஏமாற்றி வந்து கொண்டு இருக்கிறார். தனது முன்னாள் காதலியால் ஏற்பட்ட அவமானத்தை போக்கி வாழ்க்கையில் ஜெயிக்க வேண்டுமென குறுக்கு வழியை தேர்ந்தெடுக்கிறார். போலி டிகிரி சான்றிதழ்களைப் பயன்படுத்தி, வேல் குமாரின் (கௌதம் வாசுதேவ் மேனன்) பிரபல நிறுவனத்தில் அதிக சம்பளம் வாங்கும் மென்பொருள் வேலையைப் பெறுகிறார். முறையான பொறியியல் பட்டம் இல்லாத போதிலும், ராகவன் படிப்படியாக உழைத்து கைநிறைய சம்பாதித்து துறையில் சிறந்து விளங்குகிறார். அவரது குறிப்பிடத்தக்க தொழில் வளர்ச்சியால் ஈர்க்கப்பட்ட ஒரு பிரபல தொழிலதிபர், பரசுராம் (கே.எஸ்.ரவிக்குமார்) தனது மகள் பல்லவியை (கயாடு லோஹர்) ராகவனுக்கு திருமணம் செய்யது வைக்க முன்வருகிறார். திருமண ஏற்பாடுகள் நடைபெறும் வேளையில் டிராகனுக்கு எதிர்பாராத வகையில் திடீரென சிக்கல் ஒன்று கல்லூரி முதல்வர் மயில்வாஹனன் மூலம் வருகிறது. அதாவது அவரது கல்லூரி முதல்வர் மயில்வாஹனன் டிராகனின் மோசடியைக் கண்டுபிடித்து, அவருக்கு ஒரு இறுதி எச்சரிக்கை விடுக்கிறார். டிராகன் மீண்டும் கல்லூரிக்குச் சென்று படித்து 48 அரியர்களையும் எழுதி பாஸ் செய்து உண்மையான பட்டம் பெற்று தொடர்ந்து அந்த நிறுவனத்தில் பணிபுரி, அப்படி தோல்வியடைந்தால் அவர் அவரையும் அவரது வாழ்க்கையையும் அவரது முதலாளி மற்றும் வருங்கால மனைவிக்கு முன்பாக அம்பலப்படுத்துவேன் என்று இறுதி எச்சரிக்கை விடுக்கிறார். வேறு வழியில்லாமல், டிராகன் மீண்டும் கல்லூரியில் வளாகத்திற்குள்; நுழைகிறார். டிராகன் தனது கடந்த காலத்தை எதிர்கொண்டு இந்த இக்கட்டான சூழ்நிலையில் இருந்து வெளியேறினாரா? இல்லையா? மீண்டும் முறையாக தேர்வு எழுதி பட்டம் பெற்றாரா? அந்த 48 அரியர்களை எழுதும் போது அவரது வாழ்க்கையில் எதிர்பாராத பல விஷயங்கள் நடந்தன? அது என்ன? டிராகனுக்கு பல்லவியுடன் திருமணம் நடந்ததா? போன்ற கேள்விகளுக்கு மீதிக்கதை பதில் அளிக்கும்.

டிராகன் கதாபாத்திரத்தை கல்லூரி மாணவராக பிரதீப் ரங்கநாதன் மிகச் சிறப்பாக சித்தரித்துள்ளார். அவரது தனித்துவமான தோற்றமும் உடல் மொழியும் இன்றைய இளைஞர்களுக்கு மிகவும் பொருத்தமானவை. ஒரு மென்பொருள் நிபுணராக அவரது பிந்தைய பாத்திரத்தில் கவலை மற்றும் அவர் அனுபவிக்கும் பதற்றம் ஆகியவை சம்பந்தப்பட்ட எமோஷனல்  காட்சிகளில், அவர் மிகவும் இயல்பான நடிப்பை வழங்குகிறார்.

படத்தில் மற்றொரு ஹீரோவாக கல்லூரி முதல்வர் மயில்வாகனனாக நடிக்கும் மிஷ்கின், படத்தின் முக்கிய முதுகெலும்பாக இருக்கிறார். அழுத்தமான பாத்திரத்தில் பார்வையாளர்களை ஈர்க்கக்கூடிய நடிப்பை எந்த அலட்டலும் இல்லாமல் அசால்டா வழங்கி டிராகனுக்கு ஒரு புதிய பரிமாணத்தை சேர்க்கிறார்.

முதலில் கல்லூரி மாணவியாகவும் பின்னர் விரிவுரையாளராகவும் தோன்றும் அனுபமா பரமேஸ்வரன், இரண்டாம் பாதியில் குறிப்பிடத்தக்க தாக்கத்தை ஏற்படுத்துகிறார். மேலும் அனுபமாவிற்கும் பிரதீப் ரங்கநாதனுக்கும் இடையிலான சில இதயப்பூர்வமான தருணங்களும் தனித்து நிற்கின்றன.

பல்லவியாக கயாடு லோஹர் அழகாகத் தெரிகிறார், படத்தில் அவருக்கு அதிக வேலை இல்லை என்றாலும் கிடைத்த வாய்ப்பை சிறப்பாக செய்துள்ளார்.
பிரதீப்பின் தந்தையாக ஜார்ஜ் மரியன், ஒவ்வொரு காட்சியிலும் ஒரு திடமான நடிப்புடன் பிரகாசிக்கிறார்.

விஜே சித்து, ஹர்ஷத் கான், கே.எஸ்.ரவிக்குமார், கௌதம் வாசுதேவ் மேனன், இந்துமதி, தேனப்பன் உட்பட அனைவரும் வலுவான நடிப்பை வழங்கியுள்ளனர் மற்றும் திரைக்கதைக்கு பலம் சேர்த்துள்ளனர்.

லியோன் ஜேம்ஸ் இசையில் விக்னேஷ் சிவன், கோ சேஷா, கானா அபேலோ ஆகியோரின் பாடல் வரிகள் கேட்கும் ரகம். பின்னணி இசை பதட்டமான தருணங்களை திறம்பட மேம்படுத்துகிறது.

ஒளிப்பதிவாளர் நிகேத் பொம்மியின் ஒளிப்பதிவு, ஐடி மற்றும் கல்லூரி பின்னணிகளை திறம்படவும் அழகாகவும் படம் பிடித்துள்ளது.

பிரதீப் இ ராகவின் எடிட்டிங்  திரைக்கதைக்கு துடிப்பு சேர்க்கிறது.

சீரற்ற கல்லூரி வாழ்க்கை, கல்லூரியை விட்டு வெளியேறிய பிறகு ஏற்படும் விளைவுகள், இளம் மாணவர்கள் வாழ்க்கையில் வெற்றி பெற தவறான பாதையை தேர்ந்தெடுக்கும் போது எதிர்கொள்ள வேண்டிய கடுமையான விளைவுகள், இயக்குனர் அஸ்வத் மாரிமுத்துவின் திரைக்கதை சமகால பிரச்சினையை வலுவாக எடுத்துக்காட்டுகிறது. மேலும், ஒட்டுமொத்த கதாபாத்திர வடிவமைப்பு மற்றும் விறுவிறுப்பான திரைக்கதையில் திணிக்கப்படாத நகைச்சுவை மற்றும் உணர்ச்சி ரீதியான தாக்கத்தை ஏற்படுத்தும் க்ளைமாக்ஸில் அழுத்தமான பல உணர்வுபூர்வ தருணங்கள் தான் படத்தின் ஹைலைட்.

மொத்தத்தில் ஏஜிஎஸ் என்டர்டெயின்மென்ட் (பி) லிமிடெட் தயாரித்துள்ள டிராகன் இளமை துள்ளலுடன் கலக்கும் ஒரு நேர்த்தியான பொழுதுபோக்கு சித்திரம்.